Nandi Hills - Day picnic

Bahut dino se plan kar rahe the ki Bangalore ke aas paas kahi jaya jaye. Finally 1 Sunday ko ham log nikal liye Nandi Hills ke liye, saath mein tha apna friend Pracheer and his family. Nandi Hills ke liye hamne Outer Ring Road pakdi towards North aur uske baad liya NH 7 to Hyderabad. Road shaandar thi till Devanhalli Airport, 60 KMS ka pata hi nahi chala, uskebaad 1 village road li for next 12 KMS, wo road typical village road thi, and then another 8-10 KMS pahadi chadhai.

Nandi Hills ke pehle padao per pahuche, aur waha per 1 ticket liya aur fir thoda aur upper chade. Weather thoda cloudy tha, lekin bahut achha tha. Car parking mein thodi fight hui lekin 1 jagah mil hi gayi parking. Sochatha ki thodi bahut hiking hogi, lekin aisa kuch nahi tha, thoda chale, 1 Nehru guest tha, waha koi serial ki shooting chal rahi thi. Thoda aage chale to 1 bahut shaandar Vista point aaya, neeche ka najara kaafi shaandar tha. Kuch bandar ladai kar rahe the aur decide karna mushkil tha ki kaun sa bandar apne ko sikandar samajh raha hein.

Thoda aage chale to 1 mandir aaya aur mandir se thoda aage 1 aur Vista point, waha se 1-2 hills dikh rahe the aur najara bahut hi shaandar ban pada tha. Kisi ne bataya ki Nandi hills Tipu Sultan ka summer time spend karne ki bhi jagah hoti thi. 1 restaurant per foster beer ka board laga tha, man machla ki chalo thodi beer pee jaye, lekin biwi ne aankh dikha di ki abhi wapas car chalani hein.

Thoda patelgiri kari aur kuch pictures li, fir socha

ki aab kya kare, to bachho ko tabhi park dikhai de gaya, hamne kaha chalo aab set ho gaya. Park mein bachho ki mummiyo ko 1 jhoola dikha aur unka bhi man hua gol gol ghumiyo ghumiyo karne ka. Finally jab bachhe uchal kood karke thak gaye to hamne kaha ki chalo aab lunch karke nikla jaye. Car ke paas wapas pahuche, lunch nikala, 1 achhi ji si jagah dhoondi aur khane beth gaye, 5 minute baad aas paas dekha ki kuch bin bulaye mehmaan bandar ke roop mein aas paas beth gaye hein, ham waha se bhage aur car mein beth kar khana khane lage. Bandar to sikander hein, wo hamari Car ki hood per hi aakar beth gaye. Kisi tarah se lunch khatm kiya, aur baarish bhi shuru ho gayi thi, bole to time to go back.

Wapas aate hue pahadi se neeche utar kar socha ki kis raaste se aaye the, left jaoo ki right jaoo, finally right liya, lekin NH-7 per pahuch kar pata chala ki left wala road jyada achha tha. Aur fir Pracheer ghar pahuch kar chai pee aur khana khaya aur nikal liye apne ghar ki taraf Outer Ring Road south pakad kar.

Oye Tani, ye Bangalore mein apne north type road side Dhaba nahi milta yaar, kuch karna padega.

Movie Review : Chak de India

Director: Shimit Amin
Producer: SRK ka bhai - Aditya Chopra
Cast: SRK and bahut sari ladkiya

Chak De India, release timing bahut shaandar hein, 1 dam bharat ke 60th Independence per, SRK ki saal ki first movie. Bangalore mein hindi movies ke tickets 1st week mein lena bahut fight hein, Bangalore ko 6 languages ko support karna hota hein, number of multiplexes kam hein, aur apne ko bahut mushkil se 1 theatre mein morning show ki ticket mile.

Movie dekhne gaye, poori family mein bahut excitement tha, 1 to bahut dino baad theater per movie dekhne ja rahe the doosra SRK ki movie, aur teesra hockey ki movie. 1 ne poocha, bhai ye hockey mein itna interest kabse, hamne kaha bhai, bahut dino se bharat ko Hockey mein jeette hue nahi dekha hein, this will be the best platform to watch Indian hockey team winning that too against Australia.

To bhai kahani is prakar hein ki apne SRK bole to Kabir Khan Indian Team ke jane mane player, lekin unki 1 galti ki wajah se Bharat ko Pakistan se haar ka samna karna padta hein, aur bhala ho news channel walo ko, Kabir Khan ko gaddar karar de diya jata hein. 7 saal baad, kuch maara mari karke Kabir Khan ko Indian Women Hockey Team ka Coach bana diya jata hein jo ki world cup mein participate karne wali hein. 1 sawal uthta hein, bhai women team hi kyon, men team team kyon nahi, is sawal ka jawab to bhai SRK hi denge.

Theek hein sahab, team assemble ho jati hein, koi punjab se, koi Aasam se, koi Haryana se, bole to poora hindustan, sabhi 16 ladkiyo ki entry shaandar hein. Kuch players purani hein, kuch nai hein, kuch ko communication problem hein, kuch ko apni state captain ka guroor hein. Lekin Kabir khan sabko 1 baat bol deta hein ki sabhi log India ke liye khel rahe ho, state ke liye nahi, aur team ka Goonda mein hoon. Training shuru ho jati hein, ladkiyo ki thodi bahut politics, wo apna Kabir khan achhe se settle kar dete hein, kyonki Kabir Khan mein 1 SRK chupa hua hein. 1 intersting match ladko ki team ke saath bhi hota hein jo ki women team ka world cup mein jana final kar deta hein. World cup ki shuruat Australia ke saath haar ke saath hoti hein - ye to hamara trademark hein, har tournament ki shuraat haar se hi shuru karte hein. Aur is haar ke baad Team India peeche mud kar nahi dekhti. Coach ne team ko khelna hi nahi sikhaya, aggressivness bhi sikhai, koi 1 maarta hein to tum 2 maro, aur is chakkar mein pit gayi Argentina. Finally, final mein Australia ko dhone ka maja hi kuch aur hein, koi bhi game ho ya movie ho, Australia ko dhona bahut shaandar hota hein.

Movie mein kuch achhe gane hein aur josh dilate hein, lekin background mein hi bajte hein. SRK ko koi heroine assign nahi kari hein, achha hein, nahi to thoda focus divert ho jata. Ladkiya sari nai hein aur bahut achha kaam kiya hein, sabhi ladkiya sahi mein lagti hein ki kis state se aayi hein. Waise 1-2 ladkiya kisi serial ya movie mein aa chuki hein. Kuch dialogs wo bhi haryanwi language mein mast hein e.g. "Aab bhes ki pooch padne se ka milega", "Chal dikha de us launde ko".

Kisi ne bola ki bhai Amitji bachhanji ko coach banana tha, movie mein aur dam aata, hamne kaha nahi bhai, aajkal Amitji bachhan ji ke saath young ladkiya ka movie mein aana theek nahi hein, SRK hi hein jo fit hein, aur 1 akele Amitji se kya kya karwayoge.

Movie bahut shaandar hein, aur shayad is saal ki pehli shaandar hindi movie hein. Pata nahi is movie se Indian Hockey specially Indian woman hockey ko kitna benefit hoga, lekin SRK ko to bahut hoga.

Bole to Chak De India, and now waiting for "Ramu ki Aag".